عش الزوجية – الحوائط و السقف

مجموعة تدوينات عن تجهيز شقتي هبدأ في كتابتها أعرض فيها تجربتي يمكن أحد يستفيد منها

بداية تجهيزي لشقتي كان في ديسمبر 2009 بعد فترة من شغلي وبعد ما بقى معايا مبلغ من شغلي وكانت فكرة الزواج بعيداً جداً عن دماغي لكن فكرت في حاجة تتعمل مفيدة بالفلوس خاصة و أني من الشخصيات اللي بتصرف كتير فطبعاً الفلوس كانت هتتبخر على الفاضي ففكرت إني أبدأ في تجهيز شقتي وكانت البداية طبعاً إن يكون في حوائط وسقف عشان يبقى في شقة من الأساس  ..

وكانت البداية بشراء الحديد – بالمناسبة كان حديد عز

و الطوب الأحمر .. المنتشر بيه البناء في مصر على خلاف دول الخليج و غيرها اللي بتبني بالبلوكات الأسمنتية

وكانت المعضلة إن عندنا في البيت جدارين ناحية الجار مبنيين بالطوب الأبيض أو الوردي … و المشكلة إن الطوب ده مش متوفر لأن إستخدامه قليل جداً و سعره تقريبا ضعف سعر الطوب الأحمر العادي .. فأضطررت إني أروح أجيبه من منطقة بعيده حوالي 20 كيلو .. كل ده عادي .. المشكلة بقى إني لما روحت هناك لقيت الطوب بس مافيش حد يحمله ليك .. لازم إنته زي الباشا كده تجيب عربية و تحمل عليها الطوب .. وحملنا الطوب طوبه طوبه أنا وعمي ربنا يديله الصحة .. صورة للعربية بعد التحميل

العمال بينزلوا الطوب قدام البيت عندنا – حرام يعني أنزله كما مش كفاية حملته

للأسف معنديش صور للشقه وهي على الطوب .. ودي صور من فوق السقف قبل تسليحة بالحديد – و البرتقالي دي خراطيم الكهرباء

بعد تسليح السقف بالحديد

معنديش صور ليوم صبة خرسانة السقف لأني كنت مشغول يومها جداً جداً مع العمال .. الحمد لله ربنا ستر يومها لإني إتكعبلت في شبكة الحديد على السقف وكنت هقع من الرابع .. الحمد لله

شغل المعمار في الشتاء بيبقى حلو مع أن النهار قصير لأن العمال بيبقوا فاضيين نسبياً مش زي الصيف .. لكن عيب الشغل في الشتاء – خصوصاً في البناء و صب السقف – أنك بتبقى مجبر إنك ترش الحوائط و السقف مية لفترة معينة الساعه 6 الصبح يعني في عز التلج